சீனாவில் நடைபெற்று வரும் ஷாங்காய் மாஸ்டர்ஸ் டென்னிஸ் போட்டியின், ஆடவர் இரட்டையர் பிரிவு இறுதிப் போட்டி இன்று நடைபெற்றது. இதில், இந்தியாவின் லியாண்டர் பயஸ்-செக் குடியரசின் ரடேக் ஸ்டெபானிக் ஜோடி, இந்தியாவின் மஹேஷ் பூபதி- ரோஹன் போபண்ணா ஜோடியை எதிர்கொண்டது.
மிகுந்த எதிர்பார்ப்பை ஏற்படுத்திய இந்தப் போட்டியில் முதல் செட் ஆட்டம் டை- பிரேக்கர் வரை சென்றது. அந்த செட்டை பூபதி-போபண்ணா ஜோடி 7-6 என்ற புள்ளிக் கணக்கில் கைப்பற்றியது. ஆனால், இரண்டாவது செட்டை 3-6 என்ற புள்ளிகளில் எளிதில் இழந்தது. இதனால், மூன்றாவது செட்டில் வெற்றி பெற்று கோப்பையை கைப்பற்றும் முனைப்பில், இரு ஜோடிகளும் ஆர்வம் காட்டின.
இறுதியில் பயஸ்-ஸ்டெபானிக் ஜோடி, 10-5 என அந்த செட்டை கைப்பற்றி
கோப்பையை வென்றது. லண்டன் ஒலிம்பிக் போட்டியில் பயஸூடன் இணைந்து விளையாட
மாட்டோம் என தெரிவித்திருந்த பூபதி-போபண்ணா ஜோடி, தற்போது முதன்முறையாக
பயஸ்-ஸ்டெபானிக்கை எதிர்த்து களத்தில் மோதியது. -B.R.விஸ்வநாதன்